እንኳን በደህና መጡ

    ክልሉ ከተዋቀረበት ጊዜ ወዲህ በክልሉ በርካታ የማህበራዊ፣ ኢኮኖሚያዊና፣ ፖለቲካዊ ስራዎች ሲሰሩ ቆይተዋል፤ እየተሠሩም ይገኛሉ። በዚህም ለወደፊቱ ብሩህ ተስፋን የሚያጎናፅፍ የልማትና የዕድገት ውጤቶች ተመዝግበዋል። ለዚህ ውጤት መገኘት ደግሞ ልማታዊው መንግስታችን የቀረፃቸው ትክክለኛ ፖሊሲዎች ከፍተኛውን ድርሻ ይይዛሉ።

    የክልሉ መንግስትና ህዝብም ለልማትና እድገት ካላቸው የላቀ ፍላጎት የተነሳ የተቀረፁትን ፖሊሲዎችና ስትራቴጅዎች በአግባቡ ለመፈፀም ጥረት በማድረጋቸው አሁን በክልላችን እየታየ ያለው ሁሉን አቀፍ ልማትና እድገት ሊመዘገብ መቻሉ ለማንም ግልፅ ነው። የተገኘው እድገት በገጠርም ሆነ በከተሞች ለሚኖሩ የክልሉ ህዝቦች ከፍተኛ ተጠቃሚነትን እያረጋገጠ መሆኑን ማየት ተችሏል።

     አርሶ አደሩ ምርትና ምርታማነትን በመጨመር ሐብት መፍጠር ሲችል በከተሞች በተለያዩ የሥራ ዘርፎች የተሰማራው የህ/ሰብ ክፍል የስራ እድል ከማግኘቱም ባሻገር በሚያገኘው ገቢ ቀስ በቀስ ወደ መካከለኛ ኢንዱስትሪ ባለቤትነት እየተሸጋገረ ያለበትን ጅምር ሁኔታ እየተመለከትን ነው። በእርግጥ አሁን  የተገኘው እድገት በሐገራችን ለዘመናት ተንሰራፍቶ ከቆየው ድህነትና ኋላቀርነት አንፃር ሲታይ ከፍተኛ ቢሆንም በሃገራችን ካለው የድህነት ግዝፈት አንፃር የሚያኩራራን ሳይሆን ይልቁንም የበለጠ እንድንሠራ የሚያነሳሳን እንደሆነ እንገነዘባለን።

       

የአማራ ክልል አጠቃላይ ሁኔታ

አማራ ብሄራዊ ክልል ጅኦግራፊያዊ አቀማመጥ በ80 45' እስከ 130 45' ሰሜን የኬክሮስ እና በ350 46' እስከ 400 25' ምስራቅ የኬንትሮስ መስመር ዉስጥ የሚገኝ ሲሆን አዋሳኞቹም በሰሜን ትግራይ፣ በምስራቅ አፋር፣ በደቡብ ኦሮሚያ፣ በምዕራብ ደቡብ ቤንሻንጉል-ጉምዝ ክልልና በምዕራብ ሱዳን ናቸዉ፡፡ በማዕከላዊ ስታቲስቲክስ ኤጀንሲ  (CSA) መረጃ መሰረት ክልሉ 168,966 ካሬ ኪሎ ሜትር ስፋት ያለዉ ሲሆን ይህም ከአገሪቱ ጠቅላላ የቆዳ ስፋት ዉስጥ 15% ያህሉን ይሸፍናል፡፡ በክልሉ የገንዘብና ኢኮኖሚ ልማት ቢሮ የህዝብ ቁጥር ትንበያ (Demographic Projection) መሰረት በ2006 ዓ.ም የክልሉ ህዝብ 20, 019,090 (ወ=10,011, ሴት=10,007,249) እንደሚደርስ የተገመተ ሲሆን ከዚህ ዉስጥ 16,892,093 (84%) በገጠር የሚኖር ህዝብ ሲሆን ቀሪዉ 3,126,997 (16%) በከተማ የሚኖር ነዉ፡፡ የክልሉ አስተዳደራዊ መዋቅር ሲታይ በ7 የዞን አስተዳደሮችና በ3 የብሄረሰብ አስተዳደሮች፣ በ167 የከተማና የገጠር ወረዳዎች እና በ3,600 የከተማና የገጠር ቀበሌዎች የተዋቀረ ሲሆን የአማራ፣ የኦሮሞ፣ የአዊ፣ የዋግ ኸምራና የአርጎባ ህዝቦች በጋራና በወንድማማችነት የሚኖሩበት ክልል ነዉ፡፡

  የክልሉ የቆዳ ስፋትና አደረጃጀት

ዝርዝር

መለኪያ

መጠን

የክልሉ የቆዳ ስፋት

ስኩየር ኪ.ሜ

168,966

የህዝብ ብዛት

ሚሊዮን ቁጥር

20.02

የዞን ብዛት

ቁጥር

10

ጠቅላላ የወረዳዎች ብዛት

ቁጥር

167

·         የገጠር ወረዳዎች ብዛት

"

129

·         የከተማ መስተዳደሮች ብዛት

ቁጥር

38

በሊዝ ስርዓት የሚተዳደሩ ከተሞች (እስከ 2005 ዓ.ም መጨረሻ ድረስ)

ቁጥር

46

የቀበሌዎች ብዛት

ቁጥር

3,600

 

ምንጭ፡- አብክመ ገ/ኢ/ል/ቢሮ

የመሬት አቀማመጥ፣ የአየር ንብረትና የአፈር አይነቶች

የክልሉ የመሬት አቀማመጥ ሜዳማ (37.60%)፣ ተራራማ (27.79%)፣ ጥልቅና ሰፋፊ ሸለቆዎች (11.40%) እና ረግረግ መሬቶች (1.45%) ሲሆን የከፍተኛ ቦታዎች ምድብ የሚይዘዉ ከባህር ወለል በላይ ከ1500 መሬት በላይ የሆኑትን ቦታዎች ሲሆን፣ አብዛኛው የክልሉ ሠሜናዊና ምስራቃዊ ክፍሎች በዚሁ ምድብ ውስጥ ይገኛሉ፡፡ አብዛኛው የዚህ አካባቢ ቦታዎች ሰንሰለታማና አምባ ምድሮች፣ እንደ ራስ ዳሽን (4620 ሜትር)፣ አቡነ ዮሴፍ (4290) የመሳሰሉት ትልልቅ ተራራዎችን የሚያቅፍ ነዉ፡፡ የዝቅተኛ ቦታዎች ምድብ ደግሞ የክልሉን ምዕራባዊና ደቡባዊ ቦታዎች የሚያቅፍ ሲሆን ከባህር ወለል በላይ ያላቸዉ ከፍታ ከ500-1500 ሜትር ነዉ፡፡ ይህ ምድብ የትልልቅ ወንዞችን፣ ተፋሰሶች የሚሸፍንና ሜዳማ የሆነ የመሬት አቀማመጥ ያለዉ በመሆኑ ሰፋፊ እርሻዎችን ለማካሄድ አመቺነት ያለዉ አካባቢ ነዉ፡፡

ክልሉ በ4 ዋና ዋና የአየር ንብረቶች የተከፋፈለ ሲሆን 33.66% ቆላ፣ 20.37% ያህሉ ደጋ፣ 45.14% ወይና ደጋ፣ 0.83% ያህሉ ደግሞ ዉርጭ የአየር ንብረት አለዉ፡፡ የክልሉ ከፍተኛ የሙቀት መጠን ከ27.8 ዲግሪ ሴንቲግሬድ በላይ ሲሆን ዝቅተኛዉ ከ12.4 ዲግሪ ሴንቴግሬድ በታች ይወርዳል፡፡ የክልሉ ዓመታዊ የዝናብ መጠን ዝቅተኛዉ ከ500-700 ሚ.ሜትር ሲሆን ከፍተኛዉ ደግሞ ከ1400 ሚ.ሜትር በላይ ይደርሳል፡፡

በክልሉ ዉስጥ በርካታ የአፈር ዓይነቶች እንዳሉ ቢታወቅም በአብዛኛዉ የተለመዱትና ለልዩ ልዩ አዝዕርት ልማት በተስማሚነታቸዉ የሚታወቁ ቀይ (30.4%)፣ ቡናማ (24.90%)፣ ጥቁር (32.05%)፣ ግራጫ (11.12%) እና ሌሎች 1.52% የመሬት ሽፋን ድርሻ አላቸዉ፡፡