Web Content Display Web Content Display

ኢንፎርሜሽን ቴክኖሎጂን በመጠቀም ኮሮና ቫይረስን በተመለከተ ስልጠና ተሰጠ

 በአብክመ የሳይንስ፣ ቴክኖሎጂና ኢንፎርሜሽን ኮሙኒኬሽን ኮሚሽን አመቻችነት አሜሪካን አገር በሚኖሩ የህክምና ባለሙያዎች የኮሮና ቫይረስን (COVID 19) አስመልክቶ በስካይፒ ስልጠና ተሰጥቷል፡፡ ሚያዚያ 14/2012 ዓ.ም ለግማሽ ቀን ያህል በኮሚሽኑ የስልጠና ማዕከል በተሰጠው ስልጠና ከኢትየጵያ ህክምና ተማሪዎች ማህበር ባህር ዳር ቅርንጫፍ የተውጣጡ የህክምና ተማሪዎች የተሳተፉ ሲሆን ስልጠናውን የሰጡት ደግሞ YGT በሚል ስያሜ የተሰባሰቡ በጎ ፈቃደኛ የህክምና ባለሙያዎች ቡድን አባላት ናቸው፡፡

የቡድኑ አባላት በአሜሪካን አገር የሚኖሩ ኢትዮጵያውያን ሲሆኑ ስልጠናው በተለያዩ ክፍሎች የተዋቀረ ሲሆን አራት ያህል አላማዎችን መሰረት አድርጎ የተቀረጸ መሆኑን ከስልጠናው ለመረዳት ተችሏል፡፡

በስልጠናው የተሳተፉት በተለያዩ የአገሪቱ ዩኒቨርሲቲዎች በህክምና ፋካሊቲዎች በመማር ላይ የሚገኙ የአምስተኛ አመት የህክምና ተማሪዎች ሲሆኑ ህብረተሰቡን ስለቫይረሱ ምንነት ለማስገንዘብ አላማ አድርገው ወደ ስልጠናው እንደመጡ ገልጸዋል፡፡ ከስልጠናው በኋላም ይህንን ተግባር ለመወጣት በንቃት እንደሚሰሩ አክለው አመልክተዋል፡፡በዕለቱ ስልጠናውን በመስጠት ስምንት ያህል የ YGT ቡድን አባላት የተሳተፉ ሲሆን ሁሉም የህክምና ባለሙያዎች መሆናቸውን ለማወቅ ተችሏል፡፡

Web Content Display Web Content Display

የምርትና አገልግሎት ጥራት አስፈላጊነት

@ @ @ @ @ @ @ @ @

መግቢያ

በአብክመ የሳይንስ፣ቴክኖሎጅና ኢንፎርሜሽን ኮሙኒኬሽን ኮሚሽን በአዋጅ ቁጥር 234/2008 ዓ.ም መቋቋሙ ይታዎቃል፡፡ ኮሚሽኑ በማቋቋሚያ አዋጁ መሠረት ዝርዝር ተግባራትና ሃላፊነቶች ተሰጥተውታል፡፡ ከነዚህም መካከል፡-ምርቶችና አገልግሎቶች የጥራት ደረጃቸውን አሟልተው እንዲገኙ ጉዳዩ ከሚመለከታቸው አካላት ጋር በመተባበር ይሰራል፤

በክልሉ ውስጥ በአገልግሎት ላይ እየዋሉ ባሉት የሳይንስ መሳሪያዎች ላይ የካሊብሬሽን /ልኬት/ ስራዎች መከናዎናቸውን በየጊዜው ይከታተላል፤ ይቆጣጠራል፤ ባህላዊ መመዘኛዎች ወደ ዘመናዊ አለካክ ተለውጠው መተግበራቸውን ይከታተላል፡፡

በመሆኑም ኮሚሽኑ ጉዳዩ ከሚመለከታቸው ተቋማት ጋር በመተባበር እየሰራ የሚገኝ ሲሆን፤ስራውን ግልፅና ተደራሽ ለማድረግ ለደንበኛውና ለሚመለከታቸው አካላት የግንዛቤ መፍጠሪያ ይሆን ዘንድ ይህን ብሮሸር አዘጋጅተን አቅርበናል፡፡

ጥራት ማለት በቀጥታ የተገለጸንና በተዘዋዋሪ መንገድ የተመለከተን ፍላጎት የማሟላት ችሎታውን የሚገልጽ የአንድ አካል አጠቃላይ ባሕርይ ነው፡፡ ለአንድ ምርት የተቀመጠውን የጥራት መስፈርትና ምርቱ ያለውን የጥራት መስፈርት በማነፃፀር የሚገኝ የንፅፅር ውጤት ጥራቱን ያሟላ ወይም ጥራቱን ያላሟላ ምርት ወይም አገልግሎት ተብሎ እንዲቀመጥ ያስችላል፡፡ በጥቅሉ የአንድ ምርትና አገልግሎት የዕድገት ደረጃ ወይም ለሚፈለገው አገልግሎት ጥቅም ላይ መዋሉ የሚለካበት መስፈርት ነው፡፡የጥራት አይነቶች በአምስት ዋና ዋና ክፍሎች ይከፈላሉ፡፡እነሱም፡-

· የምርት ጥራት  /Product quality/

· የአገልግሎት ጥራት / Service quality/

· የልምድ ጥራት / Experience quality/

· የውሂብ ጥራት /Data quality/

· የመረጃ ጥራት / Information quality/ 

1. የምርትና አገልግሎት ጥራት ስንል ምን ማለት ነው?

 · ምርቱ/ አገልግሎቱ የሚፈለገውን መስፈርት ማሟላትን

· ከእንከንና ብልሽት ነፃ መሆንን

· የደንበኛ የእርካታ ደረጃን ማሳየት

· የአንድን ምርት/አገልግሎት ትክክለኛነት ለመወሰን የምንጠቀምበት መመዘኛ ነዉ፡፡

· የተቀመጠውን የጥራት መስፈርትና ምርቱ/አገልግሎቱ ያለውን የጥራት መስፈርት በማነፃፀር የሚገኝ የንፅፅር ውጤት ነው፡፡

· የንፅፅር ውጤቱም ጥራቱን ያሟላ ወይም ጥራቱን ያላሟላ ምርት ወይም አገልግሎት ተብሎ እንዲቀመጥ ያስችላል፡፡

የምርትና አገልግሎት ጥራት እንዴት ማምጣት ይቻላል?

 ጥራትን ለማስጠበቅ የሚቻለው ተያያዥነት ባለው ሂደት ሲሆን ይህም በቀጣይነት ለማሻሻል የሚያበቃ ክትትልና ቁጥጥር ሲኖር ነው፡፡ ይህ ተያያዥነት ያለው ሂደት ከከፍተኛ የስራ አመራር ለጥራት ካላቸው ቁርጠኝነት የሚጀምር ሲሆን ይህም፡-

 · ደንበኛው የሚፈልገውን እና የሚጠብቀውን መለየት፣

· የደንበኛ ፍላጎት በቀጣይነት ለማርካትና እውን ለማድረግ የሚረዳውን የሥራ አመራር ስርዓትን መተግበርና መጠበቅ፣

· የምርቶችና የአገልግሎቶች ንድፈ ሃሳብ የደንበኛ ፍላጎትን ያገናዘበ ማድረግ፣

· ምርቶችንና አገልግሎቶችን በንድፈ ሃሳቡ መሰረት ተግባራዊ ማድረግ፣

· ምርቶችና አገልግሎቶችን ወደ ተጠቃሚ ከመድረሳቸው በፊት የሚፈለገውን መስፈርት ማሟላታቸውን ማረጋገጥ፣

· የደንበኛ እርካታን ሊጎዱ ከሚችሉ የምርትና የአገልግሎት አቅርቦቶች መቆጠብ፣

· በምርትና በአገልግሎት ውስጥ ባዕድ የሆኑ ባህሪያቶችን መለየትና ማስወገድ፣

· የደንበኛ ፍላጎትን ወጪ ቆጣቢ በሆነ መንገድ መመለስ፣

· በውጤታማነትና በብቃት መተግበር፣

· የደንበኛ ግብረ-መልስ ማጥናት፣

· ደንበኛውን ለማርካት ትጉህና ቁርጠኛ በመሆን ጥራትን ማረጋገጥ ይቻላል፡፡

 2.የምርትና አገልግሎት ጥራት አስፈላጊነት

ጥራት በሰው ልጅ የዕለት ተዕለት ኑሮ ላይ ከፍተኛ ድርሻና ጥቅም ያለው ሲሆን ለአምራችና ለአገልግሎት ሰጪ ድርጅቶች ደግሞ ምርቶቻቸውንና አገልግሎቶቻቸውን ለማስፋፋትና ለማሳደግ ቁልፍ ሚና ይጫወታል፡፡ከጥራት አስፈላጊነቶች መካከል፡-

· የደንበኛን እርካታ መጨመር

· ደንበኛን ለመሳብ ቁልፍ ሚና አለዉ

· ለረጅም ጊዜ ተወዳጅነትን ማትረፍ

· ትርፋማነትን ይጨምራል

· ጥርጣሬን ይቀንሳል/ እምነትን በደበኞች ላይ ይጨምራል

· ጥራት አለም አቀፍ የገበያ ተወዳዳሪ ለመሆን ቁልፍ ሚና አለዉ

· ጥራት የደንበኛን ደህንነትን ያስጠብቃል

· ጥራት ምርታማነትን ይጨምራል

· ጥራት የጥገና ወጭን በመቀነስ ከአላስፈላጊ ወጭ ያድናል

· ጥራት የገበያ ድርሻን በማስፋት ትርፋማነትን ይጨምራል

· ጥራት የአንድን አምራች ድርጅት የምርት ስም በማጠናከር ፤ ለማስታወቂያ የሚወጣን ወጭ ይቀንሳል፡፡

የጥራት ሥርዓትን ጥቅም ላይ ያዋሉ ድርጅቶች፡-

በአብዛኛው በዓለም ላይ የሚገኙ ድርጅቶች የጥራትን ሚና ዘግይተው በመረዳታቸው የተነሳ በድርጅቶቹ ዕድገትና ህልውና ላይ ከፍተኛ ጉዳት አድርሷል፡፡የጥራትን ጥቅም በመረዳት፤ የጥራት ሥርዓትን ጥቅም ላይ ያዋሉ ድርጅቶች፡-

· የደንበኛ እርካታን ያሳድጋሉ፣

· ወጪን በመቀነስ ትርፋቸውን ይጨምራሉ፣

· በተሻለ መንገድ ለማምረትና ለማገልገል የሚረዱ የፈጠራ ሥራዎችን ያጎለብታሉ፣

· የሥጋት ምንጮችን በቀላሉ በመለየት ለመቆጣጠር ይችላሉ፣

· አጠቃላይ የድርጅቱን ኃላፊነት በመወጣት ደህንነቱን ለማረጋገጥ ይችላሉ፣

· ከህግና ደንብ ውጭ በሚሰሩ ሥራዎች ሳቢያ የሚመጡ ቅሬታዎችን ያስወግዳሉ፣

· ለሚፈለገው አገልግሎት ተገቢ የሆነ ምርት በቀጣይነት እንዲያመርቱ ያስችላቸዋል፡፡

· አላስፈላጊ ወጪን ይቀንሳሉ፣ የድርጅቱን ደረጃ ያሳድጋሉ፣ ህጋዊ መሰረትም ይኖራቸዋል፡፡

· የገበያውን ፍላጎት ለመለየት ያስችላቸዋል።

· ሙሉ አቅማቸውን ተጠቅመው ውጤታማ ምርት እንዲያመርቱ ያስችላቸዋል፡፡

· የተበላሹ ምርቶችን በማስወገድ ውጤታማ ምርት እንዲያመርቱ ይረዳቸዋል፡፡

· በየጊዜው በቀጣይነት ውጤታማ ምርት ለማምረት ይችላሉ፡፡

ጥራትን ማዕከል ያደረገ የገበያ ስትራቴጂን መከተል በዓለም ገበያ ውስጥ ተወዳዳሪ ሆኖ ለመዝለቅ ለገበያ የሚቀርቡ ምርቶችንና አቅርቦቶችን ጥራት የሚያረጋግጥ ስርዓትን መዘርጋት አስፈላጊ ሲሆን ይህም በዋናነት የሚጠቅመው ደንበኛው የሚጠብቀውንና የሚፈልገውን ምርትና አገልግሎት አሟልቶ እርካታን ለማሳደግ ነው፡፡ይህንንም አላማ ለማሳካት ISO 9000 የጥራት ስራ አመራር ስርዓት ደረጃንና ከሦስተኛ ወገን ማረጋገጫ ምስክርነትን /Third Party Certification/ አቀናጅቶ በመተግበር የሸማችና አምራች ድርጅቶችን በገበያ ውስጥ ተሳትፎ በዘላቂነትና በውጤታማነት ለማስቀጠል ሁነኛ መፍትሄ ነው፡፡

ጥራትን የማስጠበቅ ኃላፊነት የማን ነው?

· የተቆጣጣሪ ተቋማት፣

· የደረጃዎች ድርጅት፣

· የተስማሚነት ምዘና ድርጅቶችና የአክሪዲቴሽን አካላት፣

· የሸማቾች ማህበራት፣

· የአምራች ድርጅቶችና አገልግሎት ሰጪ መ/ቤቶች፣

ተጠቃሚዎች እና ሌሎች

3. የምርትና አገልግሎት ጥራት ጉድለት ምን ያስከትላል?

ምረቱ/አገልግሎቱ የሚፈለገውን የጥራት መስፈረት ሳያሟላ ሲቀርና የምርት የቆይታ ጊዜው ሲያልፍ ጥራት ጎድሎታል ይባላል፡፡የምርት የጥራት ጉድለት ሊከሰት የሚችለው፡-

· በማምረት (Production)

· በማቀነባበር(Processing)

· በማሸግ(packaging)

· በማከማቸት(storage)

· በማጓጓዝ (Tranportatin) ወቅት ነው፡፡

3.1. የጥራት ጉድለት ከአምራች ድርጅቶችና አገልግሎት ሰጭ ተቋማት አንፃር

· ደንበኞች ላይ መጠራጠርን በመፍጠር  ደንበኞቹን ያሳጣዋል፤

· ከፍተኛ ለሆነ ተጨማሪና አላስፈላጊ ወጭ ያጋልጣዋል፤

· ምርቱንና የአምራች ድርጅቱን ስም ዝቅ ያደርገዋል፤

· ምርቱን ለማስታወቅ ተጨማሪ የማስታወቂያ ወጭ ያስወጣዋል፤

· በዓለምና በሀገር አቀፍ ደረጃ የገበያ ተወዳዳሪነቱ ዝቅተኛ ነዉ፤

· ትርፋማነቱን በእጅጉ ያወርደዋል፤

· ለረጅም ጊዜ በደበኞች ልብ ዉስጥ የመቆየት እድሉን በእጅጉ ይጎዳዋል፡፡

3.2. የጥራት ጉድለት ከተገልጋይ አፃር

የጤና፣ የደህንነትና የጥቅም ጉዳት ያስከትላል፡፡ ምሳ. በጤና ዙሪያ እንደ ካንሰር፣ ኮሌስትሮል፣ ኩላሊት፣ ደም ግፊትና የመሳሰሉ ተላላፊ ባልሆኑ በሽታዎች መጠቃትን ያስከትላል፡፡

· በተገልጋዮች ላይ አካላዊ፤

· ስነልቦናዊ፤

· ኢኮኖሚያዊ፤

· ማህበራዊና ፖለቲካዊ ቀዉሶችን ያስከትላል፤

· ህይወትን እስከ ማጣት ሊያደርስም ይችላል፤

4. የምርት የአገልግሎት ጊዜ ማለፍ ስንል ምን ማለት ነው?

የአገልግሎት ጊዜ ማለት ምርት አገልግሎት መስጠት የሚያበቃበት ቀን በሕግ አግባብ ወይም በአምራች ድርጅቱ ለሚበላሹ ዕቃዎች እሚጠበቀው የመጠባበቂያ ቀን ነው፡፡የምርት የአገልግሎት ጊዜ ማለፍ ማለት ምርቱ እሚገባዉን የጥራት ደረጃዉን ማለትም ጥንካሬዉን፤ይዘቱን፣ ቀለሙን፤ጣዕሙን፤ መዓዛዉን (ሽታዉን) ሊያጣ እሚችልበት ቀን ማለት ነዉ፡፡

 የአገልግሎት ጊዜዉ ያለፈበት ምርት የሚያስከትለዉ ጉዳት፡-

· በሰዎች ላይ የጤና ችግር ይፈጥራል፣

· የአካባቢ ብክለትን ያመጣል፣

· ተፈላጊውን የምርት ይዘት ያሳጣል፣

· በጀርሞች በቀላሉ ይበከልና ጤናን ያዛባል፤ ወዘተ.

Web Content Display Web Content Display

የከተማ ግብርና ማሳያ ተዘጋጀ፡፡

= = = = = = = = = = = = =

በአማራ ብሄራዊ ክልላዊ መንግስት የሳይንስ፣ ቴክኖሎጂና ኢንፎርሜሽን ኮሙኒኬሽን ኮሚሽን በግቢው ውስጥ የከተማ ግብርናን አተገባበር ማሳያ ቦታ ተዘጋጅቶ ተግባራዊ ሆነ፡፡ በኮሚሽኑ የተዘጋጀው የከተማ ግብርና አተገባበር ማሳያ በኮሚሽኑ አመራሮችና ሰራተኞች ህዳር 11/2013 ዓ.ም ተጎብኝቷል፡፡

በጉብኝቱ ወቅት እንደተገለጸው ይህ የከተማ ግብርና ቴክኖሎጂ በትንሽ ቦታ ላይ በርካታ የጓሮ አትክልቶችን ለማዘጋጀትና ለመጠቀም የሚያስችል ሲሆን ለአካባቢ/ለግቢ ውበትና ንጽህናም የራሱ አስተዋጽኦ አለው፡፡ ይህንን ቴክኖሎጂ በመጠቀም ማንኛውም ሰው በግቢው ውስጥ የጓሮ አትክልቶችን በማብቀል ትኩስ ምርቶችን ለመጠቀም ያስችለዋል፡፡ በተጨማሪም የሚጠቀማቸው ቁሳቁሶች ቀላልና የሚወገዱ ፕላስቲኮች በመሆናቸው የአካባቢ ብክለትን ለመከላከል ያስችላል ተብሏል፡፡

የከተማ ግብርና ቴክኖሎጂው በቀጣይ ለሌሎች ጎብኝዎች ክፍት እንደሚደረግ ታውቋል፡፡

Web Content Display Web Content Display

ኤች.አይ.ቪ/ኤድስን የመከላከል ስራ ትኩረት ሊሰጠው ይገባል ተባለ፡፡

በአብክመ የሳይንስ፣ ቴክኖሎጂና ኢንፎርሜሽን ኮሙኒኬሽን ኮሚሽን ለሰራተኞቹ የኤች.አይ.ቪ/ኤድስ ወቅታዊ ሁኔታ በሚል ርዕስ ስልጠና ሰጠ፡፡ ጥቅምት 14/2013 ዓ.ም በእንጅባራ ከተማ በተሰጠው ስልጠና ላይ አጠቃላይ ኤች.አይ.ቪ/ኤድስን የሚመለከቱ እውነታዎች ቀርበው በተሳታፊዎች ውይይት ተደርጎባቸዋል፡፡በውይይት ሰነዱ ኤች.አይ.ቪ/ኤድስ የሚተላለፍባቸውና የማይተላለፍባቸው መንገዶች፣ ኮቪድ 19ና ኤች.አይ.ቪ፣ እንዲሁም አሁን ያለበት የስርጭት ሁኔታ በአለም፣ በአገርና በክልል ደረጃ በጥናት ውጤቶች ቁጥር የተደገፈ መረጃ ቀርቧል፡፡ በቀረበው ሰነድ መሰረት ኤች.አይ.ቪ መከሰቱ ከታወቀበት እ.ኤ.አ ከ1981 ጀምሮ በዓለም አቀፍ ደረጃ ከ39 ሚሊዮን በላይ ሰዎች በኤድስ ምክንያት መሞታቸው፣  ከ14.9 ሚሊዮን በላይ ሕፃናት  ወላጆቻቸውን በኤች.አይ.ቪ ማጣታቸው እንዲሁም በየዓመቱም ከ1.7 ሚሊዮን በላይ ሰዎች አዲስ በኤች.አይ.ቪ እንደሚያዙ ተገልጿል፡፡በቀረበው የስልጠና ሰነድ እንደተጠቆመው በኢትዮጵያ የኤች.አይ.ቪ ስርጭት 0.91 ሲሆን የአማራ ክልል ደግሞ ስርጭቱ 1.2 እንደሆነ ተጠቁሟል፡፡ የሌሎች ክልሎችም የስርጭት መጠን የተገለጸ ሲሆን ከፍተኛው የስርጭት መጠን በጋምቤላ 4.98 ሲሆን በአንጻሩ ደግሞ በሶማሌ ክልል ዝቅተኛው የስርጭት መጠን 0.11 እንደሆነ ተገልጿል፡፡በስልጠናው እንደተመለከተው የኮሚሽኑ ሰራተኞች የጸረ ኤድስ ፈንድ በማቋቋም ወላጆቻቸውን በኤች.አይ.ቪ/ኤድስ ያጡ ሶስት ሴት ህጻናትን በመደገፍ ላይ መሆናቸው ተመልክቶ እስካሁን ያለው የፈንዱ የሂሳብ እንቅስቃሴ ቀርቧል፤ ተሳታፊዎች ባደረጉት ውይይት የድጋፍ መጠኑ ካለው የኑሮ ውድነት አንጻር አነስተኛ በመሆኑ ወደፊት አባላት ወርሃዊ መዋጮውን ማሳደግ እንደሚገባቸው አመልክተዋል፡፡ኤች.አይ.ቪ/ ኤድስን ለመከላከል በተሰራው ስራ የመጡ አወንታዊ ለውጦች ቢኖሩም ውጤቱ የሚያዘናጋ እንዳይሆንና አሁንም የኤች.አይ.ቪ ጉዳይ ለህብረተሰብና አገራዊ እድገት ስጋት በመሆኑ የመከላከሉ ስራ ተጠናክሮ መቀጠል እንዳለበት በተወያዮቹ ተጠቁሟል፡፡

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

የኮሚሽኑ የእቅድ አፈፃፀም ተገመገመ

በአብክመ የሳይንስ፣ ቴክኖሎጂና ኢንፎርሜሽን ኮሙኬሽን ኮሚሽን የ2013 ዓ.ም መጀመሪያ ሩብ አመት የእቅድ አፈፃፀም በሰራተኞቹና በአመራሩ ተገመገመ፡፡በተካሄደው የእቅድ አፈፃፀም ግምገማ የ2013 ዓ.ም የመጀመሪያ ሩብ አመት የእቅድ አፈፃፀም በመገምገም ደካማ እና ጠንካራ አፈጻጸሞች ተለይተው ለቀጣይ ስራዎች አቅጣጫ ተቀምጧል፡፡በግምገማ መድረኩየተስተዋለው የሩብ ዓመቱ አፈፃፀም ከእቅዱ በተለያዩ ተግባራት በጣም ከፍና በጣም ዝቅ ማለት የታየ መሆኑን ተወያዮቹ በማስገንዘብ ከፍተኛ አፈፃፀም ለታየባቸው ስራዎች እቅዱን በተገቢው መንገድ ማየትና መከለስ እንዲሁም ዝቅ ብለው ለተፈፀሙት ተግባራት ያለንን አቅም ተጠቅመን አፈፃፀሙን ከፍ ማድረግ ይገባል ብለዋል፡፡በአጠቃላይ በኮሚሽኑ ለሩብ አመቱ ከተያዘው እቅድ አንጻር አፈጻጸሙ አጥጋቢ ደረጃ ላይ እንደሚገኝ ተጠቁሟል፡፡  በዕለቱ ከእቅድ አፈጻጸም ግምገማው በተጨማሪ የተለያዩ የሰው ሃብት አስተዳደር መመሪያዎች ቀርበው ውይይት ተደርጎባቸዋል፡፡

ለሰራተኞቹ የምስጋና የምስክር ወረቀት ተሰጠ፡፡

በአብክመ የሳይንስ፣ ቴክኖሎጂና ኢንፎርሜሽን ኮሙኒኬሽን ኮሚሽን የኮረና ቫይረስ ስርጭትን ለመከላከል በሚደረገው ጥረት የላቀ አስተዋጽኦ ላበረከቱ የኮሚሽኑ ሰራተኞች የምስጋና የምስክር ወረቀት ሰጠ፡፡

የምስክር ወረቀት የተሰጣቸው የኮሚሽኑ ባለሙያዎች የኮረና ቫይረስ ስርጭትን ለመከላከል የሚደረገውን ጥረት ለማገዝ የሚያስችሉ የፖርታልና ዳታቤዝ ልማት ስራዎችን አከናውነው ስራ ላይ ያዋሉ መሆናቸው ታውቋል፡፡ በተጨማሪም ቴክኖሎጂውን ተጠቅሞ የቪዲዮ ኮንፈረንስ በማካሄድ በአንድ ቦታ መሰብሰብን በማስቀረት ኮረናን በተመለከተ ተወያዮቹ ባሉበት ሆነው ውይይት እንዲያደርጉ ያስቻሉ ባለሙያዎች የምስጋና ወረቀቱን አግኝተዋል፡፡

የምስክር ወረቀቱ የተበረከተላቸው ባለሙያዎች በባህር ዳር ከተማ የሰውና የተሽከርካሪ እንቅስቃሴ ታግዶ በነበረበት ወቅት ሌት ከቀን በመስራት ውጤት ያስመዘገቡ ባለሙያዎች መሆናቸው ታውቋል፡፡

ስልጠና ተሰጠ

በአብክመ የሳይንስ፣ ቴክኖሎጂና ኢንፎርሜሽን ኮሙኒኬሽን ኮሚሽን የተለያዩ ሲስተሞች ላይ ለባለሙያዎች ስልጠና ሰጠ፡፡ በኮሚሽኑ አዘጋጅነት ከመስከረም 20 እስከ 23/2012 ዓ.ም በባህር ዳር ከተማ በተሰጠው ስልጠና የዞንና የክልል ባለሙያዎች ተሳትፈውበታል፡፡

ከመስከረም 20 እስከ 21/2012 ዓ.ም ድረስ በተሠጠው ስልጠና ከሁሉም ዞኖች የተውጣጡ የኢኮቴ ባለሙያዎች የተሳተፉ ሲሆን ስልጠናው ያተኮረው ከወረዳ ጀምሮ እስከ ክልል ለሚደረገው የሪፖርት ልውውጥ የሚያገለግል sticc info የተሰኘ ዌብ ቤዝድ አፕሊኬሽን ሲስተም ነው፡፡ ሲስተሙ የተለማው በኮሚሽኑ ባለሙያዎች መሆኑ በስልጠናውወቅት ተመለክቷል፡፡

በተመሳሳይ ከመስከረም 22 እስከ 23/2012 ዓ.ም የተሰጠው ስልጠና በፖርታል አጠቃቀም ላይ ያተኮረ ሲሆን የፖርታሉ ተጠቃሚ የክልል ተቋማት የህዝብ ግንኙነትና የኢኮቴ ባለሙያዎች ተሳትፈዋል፡፡ ፖርታሉ ሃያ ስድስት የክልል ተቋማትን ያካተተ ሲሆን መገኛ አድራሻውም www.amhara.gov.et ነው፡፡ ፖርታሉ ውስጥ የተካተቱ ተቋማት የየተቋማቸውን መረጃዎች በየጊዜው በማስገባት ለህብረተሰቡ ማድረስ እንደሚገባ በስልጠናው ወቅት ተጠቁሟል፡፡

Web Content Display Web Content Display

ኮሚሽኑ የእቅድ አፈፃፀሙን ገመገመ ፡፡

የአብክመ የሳይንስ፣ ቴክኖሎጂና ኢንፎርሜሽን ኮሙኒኬሽን ኮሚሽን የ2011 በጀት አመት የእቅድ አፈፃፀም ግምገማና የ2012 ዓ.ም እቅድ ትውውቅ አደረገ፡፡ በእንጅባራ ከተማ ነሐሴ 09/2011 ዓ.ም ከዞን አስተዳዳሪዎች፣ አስተዳደር ጽ/ቤት ሃላፊዎች፣ ኢኮቴ አስተባባሪዎች፣ ከምክር ቤት ቋሚ ኮሚቴ፣ ከህዝብ ክንፍና አጋር አካላት እንዲሁም ከኮሚሽኑ ሰራተኞች ጋር ባካሄደው መድረክ የ2011 በጀት አመት የእቅድ አፈፃፀሙን በመገምገም የ2012 ዓ.ም እቅዱን አስተዋውቋል፡፡

በዕቅድ አፈጻጸም ግምገማው እንደተገለጸው በአመቱ 360 ለሚሆኑ የትምህርት ባለሙያዎች፤ መምህራንና ተማሪዎች በሳይንስና ፈጠራ ክበባት ዙሪያ ሰፊ ግንዛቤ የተፈጠረ ሲሆን 589 ትምህርት ቤቶች በተደራጀ ሁኔታ የሳይንስና ፈጠራ ክበባት እንዳቋቋሙ ለማወቅ ተችሏል፡፡

አገልግሎት በመስጠት ላይ በሚገኙ  የማህበረሰብ ሁለገብ መረጃ ማዕከላት በአጠቃላይ ለ89 ወጣቶች የስራ እድል የተፈጠረላቸዉ ማዕከላቱ 410,368.00 (አራት መቶ አስር ሽህ ሶስት መቶ ስልሳ ስምንት) ብር ካፒታል እንዳላቸዉ ለመረዳት ተችሏል፡፡ በሪፖርቱ እንደተገለጸው በበጀት ዓመቱ 108 ድረ-ገጾችን ለማልማት ታቅዶ 78 ድረገጽ የተለማ ሲሆን አፈፃፀሙም 72.22% መሆኑ ተመልክቷል፡፡

ከአግሮ ቢግ መንግስታዊ ያልሆነ ድርጅት በተገኘ የገንዘብ ድጋፍ ከአማራ ብረታ ብረት፣ ኢንዱስትሪና ማሽን ቴክኖሎጂ ልማት ኢንተርፕራይዝ ጋር ዉል በመያዝ ሶስት የሩዝና የሥንዴ ማጨጃ ማሽኖችንና አንድ የበቆሎ መሰብሰቢያ ማሽን በድምሩ 4 የሰብል ድህረ ምርት ቴክኖሎጅዎችን ከውጭ በማስገባት ቴክኖሎጂዎችን ለማሸጋገር የሙከራ ስራ እየተሰራ መሆኑ ተጠቁሟል፡፡በኮሚሽኑ የአፈጻጸም ሪፖርት እንደተገለጸው በባህር ዳር አይ.ሲ.ቲ ቢዝነስ ኢንኩቤሽን ማዕከል 6 አዳዲስ ካምፓኒዎችን በኔትወርክና ሶፍት ዌር ልማት እንዲሁም በጥገና ሙያዎች መቀበል ተችሏል፡፡ በበጀት አመቱ ለ1839 ተጠቃሚዎች የቪዲዮ ኮንፈረንስ አገልግሎት የተሰጠ ሲሆን ይህን አገልግሎት መጠቀም በመቻሉ ብር 9,327,028.00 (ዘጠኝ ሚሊዮን ሶስት መቶ ሀያ ሰባት ሽህ ሀያ ስምንት) የሚገመት ወጪ ማዳን ተችሏል፡፡ በተጨማሪም ከአይ.ሲ.ቲ ዕቃዎች ጥገናና የማስተካከል ሥራ ከመንግሥት ሊወጣ የነበረን ብር 5,913,857.33 ወጪ ማዳን መቻሉ በሪፖርቱ ተገልጧል፡፡

 

በሪፖርቱ በበጀት አመቱ የተመዘገቡ መልካም ውጤቶች፣ በሥራ ሂደት ያጋጠሙ ችግሮችና ቀጣይ የትኩረት አቅጣጫዎች ተለይተው ቀርበዋል፡፡ተወያዮቹ ከእቅድ አፈጻጸም ግገማው በተጨማሪ በኮሚሽኑ የተለማው STICC Info Reporting System ተዋውቋል፣ በተጨማሪም በኮሚሽኑ የ2012 በጀት አመት እቅድ ላይ ውይይት አድርገዋል፡፡በመጨረሻም በበጀት አመቱ የተሻለ አፈጻጸም በማስመዝገብ ከ1ኛ እስከ 3ኛ ደረጃ የወጡ ዞኖች የዋንጫና የሰርቲፊኬት ሽልማት ተበርክቶላቸዋል፤ በዚህም መሰረት 1ኛ ሰሜን ሸዋ፣ 2ኛ ደቡብ ወሎ እንዲሁም 3ኛ ማዕከላዊ ጎንደር ዞን በመውጣት ሽልማታቸውን ተረክበዋል፡፡በውይይት መድረኩ ከየዞኑ ዋና አስተዳዳሪዎች፣ ጽ/ቤት ኃላፊዎች፣ የኢኮቴ አስተባባሪዎች፣ ከርዕሰ መስተዳድር ጽ/ቤት፣ ከክልል ምክር ቤት የሰው ሃብትና ቱሪዝም ልማት ጉዳዮች ቋሚ ኮሚቴ፣ ከህዝብ ክንፍ ተቋማት፣ ከኢትዮ ቴሌኮም፣ ከኤሌክትሪክ አገልግሎት፣ ከፖስታ አገልግሎት ድርጅት እና የኮሚሽኑ ሰራተኞች ተሳትፈዋል፡፡